Nalalabing limang bangkay na natagpuan sa Marcos Highway ipalilibing na ng lokal na pamahalaan ng Benguet

Patuloy ang panawagan ng Benguet Provincial Police Office sa ibang himpilan ng pulisya sa kanilang rehiyon para sa posibleng pagkakakilanlan ng tatlong bangkay at dalawang kalansay ng tao na natagpuan kamakailan sa bayan ng Tuba.

Walong bangkay ang natagpuan sa Marcos Highway sa Barangay Taloy Surm noong nakaraang linggo at tatlo pa lamang sa kanila ang nakikilala.

Una nang kinilala ang mga labi nina Fahad Manan Macalanggan, 28-anyos at tubong Marawi City at si Kent Licyayo, 22-anyos na tubong Ifugao.

Ang mga labi ni Alfredo Domilos Lamenta, Jr. ay nakilala ng dati niyang misis sa pamamagitan ng mga tattoo sa kanyang katawan.

Ang lima na kinabibilangan ng tatlong naaagnas na bangkay at dalawang kalansay ay nakalagak sa Damayan Funeral Homes sa Marcos Highway.

Plano ng lokal na pamahalaan na ipalibing na ang labi ng lima bagamat problemado sila sa gastusin.