Miyembro ng Abu Sayyaf patay sa bakbakan Sulu; isa pang babaeng terorista arestado

Isang hinihinalang miyembro ng Abu Sayyaf ang nasawi sa engkwentro sa mga otoridad sa Talipao, Sulu.

Ayon kay Major Arvin Encinas, tagapagsalita ng Armed Forces Western Mindanao Command (WestMinCom) tumagal ng 20 minuto ang bakbakan sa pagitan ng mga sundalo at tinatayang 30 miyembro ng bandidong grupo.

Sinabi ni Encinas na natagpuan ang katawan ng suspek matapos ang bakbakan.

Samantala, isang babaeng miyembro din ng Abu Sayyaf ang nadakip.

Kinilala itong si Nursaina Jarad Sahi na nagtamo ng shrapnel wounds bunsod ng engkwentro.

Dinala siya sa Camp Bautista Station Hospital para malapatan ng lunas.

Ayon kay Encinas, nakumpiska ng mga sundalo ang isang M16 rifle, M203 grenade launcher at Galil rifle.