Higit 11,000 senior citizens nakinabang sa libreng sakay ng MRT-3

Mahigit 11,000 na mga senior citizens ang nakinabang na sa alok na libreng sakay ng Metro Rail Transit-3 (MRT-3).

Ayon sa Department of Transportation (DOTr), nasa 11,798 senior citizens ang nakalibre na ng sakay sa MRT-3.

Ang naturang bilang ay tala ng DOTr sa unang araw ng implementasyon ng libreng sakay bilang pakikiisa ng ahensya sa Elderly Filipino Week.

Ang libreng sakay ng mga nakatatanda sa MRT-3 ay nagsimula noong October 1 at tatagal hanggang October 7 mula alas 5:00 ng umaga hanggang 10:30 ng gabi.

Kailangan lamang ipakita ang Senior Citizen ID o anumang ID na may patunay na ang sasakay ay edad 60 anyos pataas.