AFP chief humingi ng tawad sa pamilya ni Darwin Dormitorio
Humingi ng tawad si Armed Forces of the Philippines (AFP) Chief of Staff Lt. Gen. Noel Clement sa naiwang pamilya ni 4th Class Darwin Dormitorio.
Sa change of command ceremony nina resigned Philippine Military Academy (PMA) superintendent Lt. Gen. Ronnie Evangelista at kanyang kapalit na si Rear Admiral Allan Cusi, sinabi ni Clement na hindi sapat ang mga salita para ipahayag ang kanilang paghingi ng kapatawaran sa sinapit ni Dormitorio.
Ayon sa AFP Chief of Staff, kasamang nananalangin ng pamilya Dormitorio ang militar.
“Words may not be enough to convey our most profound apologies, our thoughts and prayers are with you and we could only hope for you understanding,” ani Clement.
Sa kanyang mensahe para sa mga kadete, sinabi ni Clement na hindi kailanman magiging tama ang pagmamaltrato.
Hinikayat ni Clement ang mga sinasanay na lingkod-bayan na magsalita laban sa mga nararanasang pang-aabuso.
“Maltreatment has never been right and will never be right in any circumstances. Do not be afraid to speak in the midst of injustice,” ani Clement.
Ayon pa kay Clement, laging binibigyang halaga ng sandatahang lakas ang buhay at dignidad ng tao.
Sinabi naman ng AFP Chief of Staff na naibigay na sa kanya ni Inspector General Antonio Ramon Lim ang ulat tungkol sa kaso ni Dormitorio.
Ang report anya ang magiging basehan niya para sa mga ipatutupad na kautusan sa pamunuan ng PMA.
“The inspector general has submitted to me his report and what I asked of the inspector general is to look into the process and the systems that have to be looked into to correct what happened to Cadet Dormitorio,” ani Clement.
Umaasa si Clement na sa ilalim ng bagong liderato ng PMA ay hindi na mauulit pa ang sinapit ni Dormitorio matapos ideklara ang giyera kontra hazing.
“Under the new leadership of the Academy, this unfortunate incident, however isolated it may be, will not happen again,” dagdag ng AFP official,” dagdag ng AFP chief of staff.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.