Desisyon ng US na ipagbawal sa kanilang bansa ang mga politiko na nagpakulong kay Sen. De Lima, hindi maaring kuwestiyunin – Rep. Lagman

Kung si Albay Representative Edcel Lagman ang tatanungin ay wala siyang nakikitang masama sa pasya ng United States Senate na ipagbawal na makapasok sa Estados Unidos ang mga opisyal na sangkot sa pagpapakulong kay Sen. Leila de Lima.

Ayon sa mambabatas, ang naturang hakbang ay bahagi lamang ng immigration laws ng Amerika kaya’t hindi ito maituturing na pakikialam sa soberenya ng Pilipinas.

Sabi ni Lagman, “sole prerogative” ng U.S kung sino lang ang maari at hindi puwedeng makapasok sa kanilang teritoryo.

Hindi rin aniya maaring kuwestiyunin ng ibang bansa o partido ang basehan ng “exclusionary act of sovereignty” ng Amerika.

Kung tutuusin, ayon kay Lagman, ang mga bumabatikos sa naturang hakbang ang siyang nanghihimasok sa sovereign rights ng Amerika.