Isinapubliko na ng Philippine Military Academy (PMA) ang pangalan ng ilang mga kadete na sangkot sa hazing na ikinamatay ni Cadette 4th class Darwin Dormitorio.
Kinilala ang mga ito na sina Cadet Third Class Shalimar Imperial at Cadet Third Class Felix Lumbag samantalang mayroong “direct participation” sa hazing si Cadet First Class Axl Rey Sanupao dahil siya umano ang pasimuno ng pananakit kay Dormitorio.
Sa pahayag ng pamunuan ng PMA, kanilang sinabi na bukod sa kaso ay inalis na sa academy ang nasabing mga kadete.
Sinibak na rin sa PMA si Cadet Second Class Nickoel Termil dahil sa “command responsibility.”
Pinatawan naman ng suspension order sina platoon leader Cadet First Class Irvin Sayud at commanding officer Cadet First Class Elbert Lucas.
Si Cadet First Class Christian Correa naman ay nahaharap sa “class 1 offense.”
Ipinag-utos na rin ng PMA ang pagsibak sag a military personnel na sina Major Rex Bolo (senior tactical officer) at Captain Jeffrey Batistiana (tactical officer).
Papatawan naman ng administrative charges sina Hospital officers Colonel Cesar Candelaria (commanding officer) at Captain Flor Apostol (attending physician).
Noong Setyembre 18 natagpuang walang malay ang biktimang si Dormitorio kung saan ay nakitang puno ng pasa ang kanyang katawan.
Siya ay idineklarang dead-on-arrival sa ospital.
Kanina ay nagbitiw na rin sa kanilang pwesto sina PMA Superintendent Lieutenant General Ronnie Evangelista at commandant of cadets Brigadier General Bartolome Bacarro.