Pakikipagpulong ni US President Donald Trump sa lider ng Iran maaring matuloy pa rin sa kabila ng pag-atake sa oil facilities sa Saudi Arabia

Maaring matuloy pa rin ang pulong ni US President Donald Trump sa kaniyang Iranian counterpart na si Hassan Rouhani.

Ito ay sa kabila ng tahasang pag-akusa ng US sa Iran na ito ang mastermind sa drone attacks na naganap sa Saudi Arabian oil facilities.

Ayon kay White House counselor Kellyanne Conway, ikukunsidera ni Trump na i-follow up ang kaniyang suhestyon na makapulong si Rouhani sa nalalapit na UN General Assembly session sa New York.

Una nang inako ng Tehran-backed rebels ang pag-atake sa dalawang planta na pag-aari ng Aramco.

Pero sa pahayag, sinabi ni US Secretary of State Mike Pompeo na ang Iran ang nasa likod ng pag-atake.