Lalaking dati nang nakulong dahil sa kasong may kinalaman sa ilegal na droga, patay sa pananambang

Nasawi sa pananambang ang isang lalaki na dati nang nakulong dahil sa pagkakasangkot sa ilegal na droga.

Pinagbabaril si Herson Gamilla, 44 anyos sa Barangay Malabanban Norte sa Candelaria, Quezon, Miyerkules (Sept. 4) ng gabi.

Agad namang tumakas ang mga suspek na hindi natukoy ang pagkakakilanlan.

Nakuha sa pinangyarihan ng krimen ang basyo ng mga bala mula kalibre 45 at kalibre 49 na baril.

Ayon sa mga otoridad, naaresto na noong 2016 si Gamilla at nakulong dahil sa kasong drug trafficking.

Nakalaya naman siya noong nakaraang taon matapos ang plea bargaining agreement.

Nagbabagong buhay na sana si Gamilla at pinasok ang pagiging isang tattoo artist bago mangyari ang pananambang.