Search and rescue operations, ikinasa na sa bumagsak na aircraft sa Laguna
Nagkasa na ang search and rescue operations sa bumagsak na maliit na eroplano sa Calamba, Laguna araw ng Linggo.
Sa inilabas na pahayag ng Civil Aviation Authority of the Philippines (CAAP), bumagsak ang isang BE350 medical evacuation aircraft na may registry number na RP-C2296 sa isang resort sa Barangay Pansol pasado 3:00 ng hapon.
Lulan anila nito ang walong tao kasama ang isang pilot at co-pilot.
Lumipad ang aircraft mula sa Dipolog Airport sa probinsya ng Zamboanga del Norte.
Nagsimulang mawalan ng radar contact sa eroplano bandang 3:10 ng hapon.
Natanggap naman ng Philippine Aeronautical Rescue Coordination Center (PARCC) ang Emergency Locator Transmitter (ELT) alert mula sa Corpas-Sarsat malapit sa Pansol dakong 3:14 ng hapon.
Dagdag pa ng ahensya, iniulat ng mga lokal na otoridad na nagresulta ang aksidente ng sunog bandang 4:45 ng hapon.
Agad namang na-control ang sunog sa lugar.
Nagpadala na ang CAAP ng mga imbestigador mula sa kanilang Aircraft Accident Investigation and Inquiry Board (AAIIB) para alamin ang naging sanhi ng aksidente.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.