Bus operators inatasang asistihan ang mga pasaherong stranded sa mga terminal at pantalan dahil sa bagyong Jenny

Pinag-iingat ng Land Transportation Franchising and Regulatory Board (LTFRB) ang mga pampasaherong sasakyan sa kanilang pagbiyahe dahil sa hindi magandang lagay ng panahon dulot ng bagyong Jenny.

Sa abiso ng LTFRB, inabisuhan ang mga PUVs na maging maingat sa lansangan.

Ang mga operator naman ng bus ay inatasang tugunan ang pangangailangan ng mga pasahero nila na stranded sa mga terminal o mga pantalan.

Inabisuhan din ang mga bus na sumasakay ng mga RoRo para makatawid ng dagat na huwag nang umalis sa terminal kung alam nilang hindi makapaglalayag ang barkong sasakyan.