Pinakamalaking bahagi ng panukalang pondo sa sektor ng edukasyon mapupunta sa DepEd

Nagsimula na ang budget hearing sa Kamara may kaugnayan sa panukalang P4.1T 2020 National budget.

Dito, inilatag ng mga bumubuo sa Development Budget Coordination Committee o DBCC ang mga pupuntahan ng panukalang pondo.

Sa panukalang P673 billion na pondo ng edukasyon, P551.7 billion ang ilalaan sa Department of Education (DepEd), P68.5 billion ang mapupunta sa State Universities and Colleges (SUCs), P40.8 billion ang sa Commission on Higher Education (CHED) at ang natitirang P12 billion ang mapupunta sa Technical Education and Skills Development Authority (TESDA).

Sa kabuuang budget ng sektor ng edukasyon, P109.3 billion ang para sa tertiary education kung saan P35.4 billion ang ilalaan sa pagpapatupad ng Universal Access to Quality Tertiary Education program.

Ang nasabing halaga ang gagamiting pantustos sa mga estudyanteng naka-enroll sa mga SUC, Local Universities and Colleges at mga Higher Education Institution.

Sa budget na inilaan sa DepEd, P20 billion ang gagamitin sa pagpapatayo ng mga silid-aralan, P4.8 billion ang pambili ng mga upuan, P6.5 billion ang para sa pagsasa-ayos ng mga paaralan at P2 billion ang sa pagpapailaw sa mga eskwelahan.

Mayroon din P1.5 billion pondo na ilalan para sa paaralan sa ilalim ng DepEd na nasa malalayong lugar at apektado ng mga armed-conflict.

P12.6 billion naman ang nakalaan para sa pagbili ng mga learning resources at P9 billion para sa computerization program.