Lalaki arestado matapos magpanggap na pulis sa Maynila

Timbog ang isang lalaki matapos magpanggap na pulis sa Sampaloc, Maynila.

Nakilala ang suspek sa alyas na ‘Samuel’, residente ng Brgy. Dela Paz, Pasig City.

Ayon sa Sampaloc Police, sinita ng Manila Traffic and Parking Bureau ang suspek sa P. Campa St. kanto ng A. Mendoza St. dahil sa paglabag sa number coding.

Habang tinitekitan ng traffic enforcers si Samuel, nagpakilala itong pulis mula sa Quezon City Police District Station 6.

Nagpakita pa ito ng identification card (ID) ng PNP pero duda ang traffic enforcers kaya’t agad nila itong itinawag sa UBA Police Station.

Kinumpirma ng mga pulis na peke ang ID ng suspek.

Dahil dito sasampahan ang suspek ng mga kasong usurpation of authority at falsification of public documents.