Inilatag na ng Plaza Miranda Police Community Precint ang pagbabago sa tradisyunal na Thanksgiving Procession ng Black Nazarene na gagawin sa katapusan ng Disyembre, imbes sa nakagawian na tuwing New Year o January 01.
Nasa 220 na mga pulis din ang ipakakalat na kinabibilangan ng buong puwersa ng Manila Police District o MPD Police Station-3, MPD-SWAT, Special Reaction Unit o SRU at MPD-DPSB upang pangalagaan ang kapaligiran ng Quiapo. Nauna rito, ipinalabas ni Monsignor Hernando Coronel ang pagbabago sa paglabas ng Black Nazarene sa simbahan ng Quiapo.
Gaganapin na ito sa Disyembre 31 (Huwebes), alas-kuwatro ng madaling araw sa halip na Enero a-uno ng madaling araw upang makapaghanda umano ang mga motorista at negosyante.
Sa bagong ruta ng Thanksgiving Procession, mula sa Simbahan ng Quiapo ay kakanan ng Evangelista St., kanan ng C. M. Recto patungong Loyola, kanan ng Bilibid Viejo hanggang Gonzalo Puyat pakaliwa ng Z.P. de Guzman, kaliwa ng Hidalgo St., kanan ng Quezon Blvd pakaliwa ng C. M. Recto patungong Quezon Blvd. hanggang sa makapasok muli sa simbahan.
Inaasahan naman na maapektuhan dito ang mga sidewalk vendor at parking maging ang mga motorista.