Tiniyak ng palasyo ng malakanyang na hindi itutuloy ng Pilipinas ang pagnenegosyo ng Chinese investors sa isla ng Fuga sa Cagayan, at mga isla ng Grande at Chiquita sa Subic Bay, Zambales.
Ito ay kung magdudulot ng banta sa seguridad ang planong pagtatayo ng ‘smart city’ sa tatlong nabanggit na isla.
Ayon kay presidential spokesman Salvador Panelo, hindi mag-aatubili ang palasyo na ibasura ang panukala ng Chinese investors lalo na kung sasabihin o irerekomenda ni Defense Secretary Delfin Lorenza na mapanganib para sa bansa ang mga proyekto.
Kasabay nito, sinupalpal ni Panelo ang balak ni Senadora Risa Hontiveros na imbestigahan ang Chinese investment sa tatlong isla.
Ayon kay Panelo, premature pa ang panukala ni Hontiveros dahil nasa proposal at hindi pa naman pinal ang pagnenegosyo ng Chinese investors sa tatlong isla.
Pero ayon sa kalihim, igagalang ng palasyo ang hakbang ni Hontiveros na imbestigahan ang proyekto dahil tungkulin ng Senado na busisiin ang mga isyu na sa tingin nila ay mali.