2 miyembro ng MILF patay sa pananambang sa Tacurong City

Patay ang dalawang miyembro ng Moro Islamic Liberation Front (MILF) makaraang tambangan ng hindi nakilalang gunman sa isang gas station sa Tacurong City, Sultan Kudarat.

Ayon kay Police Lt. Col. Rey Egos, Tacurong City police director, ang mga nasawi ay sina Sangutin Musil alyas Commander Jerry Amino, 53 at Alex Amino Toto, 30 anyos.

Ang dalawa ay tinambangan habang nasa AB Gasoline Station sa Alunan highway.

Nalaman na sila ay kasapi ng MILF base sa nakuhang ID sa kanila.

Batay sa imbestigasyon, sakay ng kotse ang dalawa at magpapagasolina sana nang dumating ang nag-iisang suspek sakay ng motorsiklo at pinagbabaril sila.

Dead on the spot ang dalawa.

Pinaniniwalaang rido o away pamilya ang sanhi ng pamamaslang.