Pananambang ng NPA sa apat na pulis sa Negros Oriental kinondena ng PNP

Kinondena ng Philippine National Police (PNP) ang pananambang ng New People’s Army (NPA) sa apat na pulis sa Negros Oriental.

Sa pahayag ng PNP-Public Information Office, maliban sa pinatay ay pinagnakawan pa ang mga pulis at kinuha ang kanilang mga armas at personal na gamit.

Kinilala ng PNP ang mga nasawi na sina P/Corporal Relebert Beronio, Patrolman Raffy Callo, Patrolman Roel Cabellon at Patrolman Marquino de Leon.

Tiniyak ng PNP sa pamilya ng apat na pulis na pagkakalooban sila ng karampatang tulong.

Nagsasagawa na rin ng hot pursuit operation sa Negros Oriental para mahanap ang mga nasa likod ng pananambang.

Ang apat ay tinambangan alas 2:30 ng hapon ng Huwebes (July 18) sa bahagi ng Barangay Mabato, bayan ng Ayungon.