11 estudyante patay nang mahulog sa bangin ang sinasakyang truck sa Cebu

Patay ang nasa 11 estudyante habang nasa 20 ang sugatan makaraang mahulog sa bangin ang sinasakyan nilang mini dump truck sa Boljoon, Cebu bandang ala-7:00 biyernes ng umaga.

Kinumpirma ni Boljoon Public Information Officer Ruben Nieri ang aksidente.

Ang mga mag-aaral na nasa idad na 10 hanggang 12 ay patungo ng bayan para dumalo sa “Health Week” ng Department of Education nang mangyari ang trahedya.

Hindi agad naisugod sa ospital ang mga biktima sa kawalan ng ambulansya kaya isinakay na lamang sa ibang truck ang mga ito.