Hinikayat ng Party-list Coalition Federation Inc. ang dalawang uupong Speaker sa 18th Congress na huwag nang baguhin ang itatalang chairman ng mga komite sa Kamara.
Sinabi ni PCFI President at 1-Pacman Rep. Mikee Romero, matapos ang pulong ng 54-member group, mahihirapan lamang ang buong Kamara sa kanilang legislative agenda kapag babaguhin pa ang committee chairmanship sa oras na magkaroon na ng transition sina Taguig Rep. Allan Cayetano at Marinduque Rep. Lord Allan Velasco.
Maganda aniya kung gawing consistent lamang ang mga nakaupong chairman sa 75 komite sa loob ng tatlong taon para sa matiwasay na trabaho sa kapulungan.
Nauna nang sinabi ni Albay Rep. Joey Salceda na nakakaranas ng delay ang organization sa Kamara dahil sa speakership issue.
Sinabi nito na kaunti na lamang nalalabing oras bago mag convene ang 18th Congress sa umaga ng July 22.