Ipagbabawal na ng Cebu Pacific at Philippine Airlines ang mga hoverboards sa mga eroplano.
Ang mga hoverboards ay sikat ngayon sa mga kabataan na ginagamit bilang ‘self-balancing personal transport vehicle’.
Ayon sa advisory ng PAL at CebPac, hindi na nila pahihintulutan na bitbitin ng mga pasahero sa kanilang check-in o carry-on baggage ang mga hoverboards dahil sa safety concerns.
May posibilidad anilang mag-overheat, biglaang sumiklab at masunog ang mga baterya ng mga ito na gawa mula lithium-ion.
Maituturing na ‘fire hazard’ ang mga hoverboard na delikadong ipasok sa isang pressurized cabin tulad ng eroplano.
Nauna nang ipinagbawal ng iba pang mga air carriers tulad ng United, American at British Airways at Singapore Airlines ang mga hoverboards sa kanilang mga flight.
Nitong mga nakaraang buwan, biglang lumobo ang popularidad ng mga hoverboard sa ibang bansa at dito sa Pilipinas.
Gayunman, maraming mga ulat ang kumalat sa internet kung saan sinasabing bigla na lamang sumisiklab at sumasabog ang mga ito.