CHR iimbestigahan ang pagkamatay ng bata sa police operation sa Rizal

Kinondena ng Commission on Human Rights (CHR) ang pagkasawi ng 3 taong gulang na si Myka Ulpina sa gitna ng buy-bust operation sa Rodriguez, Rizal noong June 30.

Ayon kay CHR Spokesperson, Atty. Jacqueline Ann De Guia, bumuo na sila ng grupo para imbestigahan ang kaso.

Hiniling naman ng CHR sa gobyerno na bilisan ang imbestigasyon para may maparusahan at may managot sa sinapit ng bata.

Dagdag ni De Guia, si Ulpina ay isang biktima sa kampanya ng administrasyong Duterte kontra ilegal na droga.

Kaisa anya ang CHR sa pagsugpo sa ipinagbabawal na droga pero dapat umano itong gawin ng tama at alinsunod sa batas.

Noong June 30, sa operasyon ng mga pulis ay nanlaban umano ang suspek at sinasabing ginawang panangga ang kanyang anak na si Myka.