Bitay sa drug traffickers mas madali – SP Tito Sotto

Naniniwala si Senate President Vicente Sotto III na mas malaki ang pag-asa na makalusot ang mga panukalang maibalik ang parusang kamatayan kung igagawad ito sa mga high level drug traffickers lang.

Aminado si Sotto na sa 18th Congress mas marami na silang pabor sa pagbabalik ng parusang kamatayan sa bansa dahil sa pagkakapanalo ng mga kaalyado ni Pangulong Duterte.

Ngunit aniya magiging depende pa rin ang lahat sa isasagawang deliberasyon.

Dagdag pa nito, tama lang na mabitay ang mga bigtime drug traffickers dahil kahit nahatulan sila at nasa loob ng pambansang piitan ay nagagawa pa nilang patakbuhin ang kanilang ilegal na negosyo.

Binanggit ni Sotto na sa ating mga katabing bansa, kung saan may parusang kamatayan, may takot ang mga sindikato ng droga.