Dalawang gwardya ang nasugatan matapos sumabog ang ginawa nilang improvised na tangke ng tubig sa Ermita, Manila araw ng Biyernes.
Second degree burns ang natamo ni Ricky Gallego habang nasugatan sa paa ang kasamahan nito.
Ang mga biktima ay parehong gwardya sa isang establisyimento sa Gedesco Building.
Ayon kay Police Lt. Col. Igmedio Barmaldez, Ermita Police Station commander, pinagdugtong ng mga biktima ang dalawang plastic drum para maging tangke ng tubig.
Gumamit sila ng lighter para uminit at lumambot ang isang drum at nang mabilis na maidugtong ang isa pang plastic drum pero sumabog ito.
Ayon sa Explosive Ordnance Disposal ng Manila Police District (MPD), ang mga drum ay mayroong fumes ng fruit extract distillate kaya sumabog ito nang mainitan.