Binay: 22 mangingisdang Pinoy, 2 beses inabandona ng barko ng China
Dalawang beses inabandona ang 22 mangingisdang Filipino na lulan ng bangkang nabangga ng Chinese vessel sa Recto Bank, ayon kay Senador Nancy Binay.
Sa isang pahayag, sinabi ni Binay na unang insidente ng pag-abandona ay ang pag-iwan ng Chinese crew sa mga mangingisda sa West Philippine Sea at pangalawa ang kabiguang magbigay ng “considerable attention.”
Inilabas ni Binay ang pahayag matapos ihayag ni Pangulong Rodrigo Duterte na isang maliit na maritime accident ang banggaan sa Recto Bank.
Ayon sa senador, mahirap paniwalaang aksidente ito dahil maraming beses na itong nangyari kung saan hindi lamang mga Pinoy na mangingisda ang biktima.
Nakalulungkot aniyang natatabunan ng mga pahayag ng China ang mga testimonya ng mga mangingisda.
Aniya pa, “inhumane” at “unacceptable” ang pag-iwan ng mga Chinese crew sa mga Pinoy na mangingisda matapos ang insidente sa West Philippine Sea.
Malinaw aniya ang nakasaad sa United Nations Convention for the Law of the Sea (UNCLOS) ang responsibilidad ng kapitan ng barko sa pagsagip sa “distressed” vessel.
Dahil dito, ipinahiwatig ni Binay na kailangang tawagin ang atensyon ng Chinese government para papanagutin ang responsable sa insidente.
Hindi aniya dapat tanggapin ito bilang aksidente lamang dahil ipinapakita nito kung paano pangalagaan ang mga mamamayang Filipino.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.