Chinese national na wanted sa China naharang sa NAIA

Hinarang ng mga tauhan ng Bureau of Immigration sa NAIA ang isang Chinese national na kabilang sa mga wanted persons sa China.

Ayon kay BI-Interpol chief Rommel Tacorda, naharang nila ang 42-anyos na si Wu Chuqui sa pagbaba nito ng Cathay Pacific flight sa NAIA Terminal 3.

Kasama si Wu sa red notice list of wanted fugitives ng Interpol kayat agad itong pinabalik sa Hong Kong.

Nabatid na may mga kaso si Wu kaugnay sa money laundering at may warrant of arrest para sa kanya na inilabas ng Public Security Bureau sa Shantou, China noong nakaraang taon.

Nahaharap ito sa pagkakakulong ng hanggang 15 taon kapag napatunayan sa korte ang kanyang pagkakasala.