Petisyon kontra No Bio No Boto, ibinasura ng Korte Suprema
Ibinasura ng Korte Suprema ang petisyon na kumukwestyon sa legalidad ng “No Bio, No Boto” policy ng Commission on Elections (Comelec).
Kasabay nito ay binawi na rin ng Mataas na Hukuman ang inilabas nilang Temporary Restraining Order (TRO) na pansamantalang pumipigil sa pagpapatupad ng “No Bio, No Boto” ng poll body.
Ayon kay Supreme Court spokesperson Atty. Theodore Te, walang merito ang inihaing petisyon ng Kabataan Partylist na nagsasabing labag sa saligang batas ang “No Bio, No Boto” dahil mareresulta umano ito ng disenfranchisement sa halos 3 milyong mga botante na wala o hindi nakakumpleto ng kanilang biometrics sa itinakdang panahon ng Comelec.
Nakasaad pa sa desisyon ng SC na ang layunin ng Comelec na malinis ang listahan ng mga botante ay makatutulong para maiwasan ang mga kaso ng electoral fraud.
Dahil sa nasabing desisyon ng Korte Suprema, maari nang ituloy ng Comelec ang pagtanggal sa voters’ list ng mga botanteng walang biometrics.
Una nang sinabi ng Comelec na ang pagpapatupad nila ng “No Bio, No Boto” policy ay para matiyak na malinis ang listahan ng mga botante laban sa mga flying voters.
Ayon kay Comelec Chairman Andres Bautista, welcome development sa kanila ang pasya ng Supreme Court dahil maitutuloy na nila ang paglilinis sa voters’ list.
Sa datos ng Comelec, aabot sa 2.4 million ang hindi makakaboto dahil sa kawalan ng biometrics record.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.