Ang mga biktima ay nakilalang sina Felix Bernabe, 76 at misis niyang si Estelita, 77.
Ayon kay Police Maj. Alexander Dioso, deputy chief ng Meycauayan City police, papunta sana ng palengke ang mag-asawa sakay ng kanilang tricycle nang sila ay harangin ng mag-aamang suspek kasama ang isa pang kaibigan.
Pinagpapalo umano ng mga suspek ang mag-asawa gamit ang kahoy na may kadena.
Naaresto naman na ang mag-aamang suspek at isa pang kasama nilang 15 anyos na binatilyo.
Pero ayon sa 14 anyos na si Alyas Ryan siya at ang kaniyang 15 anyos na kaibigan na si Alyas Marlon ang gumawa ng krimen.
Hindi umano nila kasama ang kaniyang ama at ang 18 anyos niyang kuya nang gawin nila ni Alyas Marlon ang paghampas sa mag-asawang matanda.
Ayon sa ama ng binatilyo, tumulong siya nang makitang nakahandusay na ang mga biktima dahil narinig nila ang mga kapitbahay na sumisigaw na mayroong naaksidente.
Inamin ni Ryan na ginawa nila ang krimen dahil lagi silang sinisita ng mag-asawang matanda kapag kumukuha sila ng mangga sa puno nito.