Hindi pa rin masabi ng Commission on Elections (COMELEC) kung kailan sila makakabuo ng desisyon tungkol sa mga disqualification cases laban sa mga kakandidato sa 2016 elections.
Kabilang na nga sa mga hindi pa rin nade-desisyunan ng COMELEC ay ang mga kasong diskwalipikasyon laban kay Sen. Grace Poe at Davao City Mayor Rodrigo Duterte.
Ayon kay Commissioner Rowena Guanzon, inaasahang matatapos na nila ngayong araw, Miyerkules, ang deliberasyon ngunit hindi pa rin nila matiyak kung kailan sila makakapaglabas ng mga resolusyon.
Hindi aniya kasi madali ang kanilang ginagawa dahil kailangang pag-aralan ng maigi ang motion for reconsideration (MR) na inihain ni Poe sa Second Division ng COMELEC para baliktarin ang pag-kansela nito sa kaniyang certificate of candidacy.
Sa kaso naman ni Duterte, nakatakdang magdaos ng pagdinig ang COMELEC First Division upang talakayin ang pagpapadiskwalipika sa kaniya ng broadcaster na si Ruben Castor. Ito ay dahil umano sa pagkakamali sa certificate of candidacy (COC) ng unang presidential candidate ng PDP-Laban na papalitan ni Duterte na si Martin Diño.
Pero bukod sa mga kaso nina Poe at Duterte, nakatakda ring talakayin ng COMELEC ang mga motions for substitutions na inihain ng iba pang mga lokal na kandidato.