Nagkasundo ang Economic Development Cluster (EDC) ng pamahalaan sa pagbuo ng isang “catch-up” strategy.
Layunin nito na maabot ang target na 7-percent growth sa ekonomiya ngayong taon.
Ito rin ang kanilang sagot sa naging mabagal na takbo ng ekonomiya ng bansa sa nakalipas na mga buwan kung saan ay umabot pa ito sa four-year low level dahil sa pagkaka-antala sa pag-apruba sa 2019 national budget.
“A catch-up plan is imperative. The EDC estimates that the government under spent by close to P100 billion during the first five months of the year due to the delayed passage of the 2019 budget”, ayon sa pahayag ni Socioeconomic Planning Secretary Ernesto Pernia.
Sinabi ni Pernia na nagkasundo sila na para abutin ang 7-percent target ay kailangan ang 6.1 percent na economic expansion sa susunod na tatlong quarters.
Ipinaliwanag naman ni Finance Sec. Carlos Dominguez III na kailangan ng Department of Public Works and Highways at Department of Transportation ang P803 Billion para maabot ang infrastructure target ng pamahalaan.
“DPWH and DOTr remain optimistic that they can deliver on their respective commitments by accelerating infrastructure disbursements and implementation of projects. To enable them to attain their targets, it would require close cooperation and support of other government agencies by expediting the approval of permits and other requirements,” dagdag pa ni Dominguez.
Sa pulong ng EDC, sila ay nagkasundo na madaliin ang pagpapatupad National ID System, 4Ps, social pension, unconditional cash transfers, at fuel marking program.