Sisimulan na sa June 4 ang joint congressional hearing sa mga alegasyon ng umanoy mga kapalpakan sa natapos na eleksyon noong May 13.
Sa panayam ng Radyo Inquirer, sinabi ni Senator Koko Pimentel na nakipag-ugnayan na siya sa kanyang counterpart sa Kamara para sa gagawin nilang pagdinig.
Ipapatawag anya ang mga opisyal ng Comelec at Smartmatic para malaman kung naging malinis ba ang halalan at kung hindi na-hack ang sistema.
Ayon kay Pimentel, layon din ng hearing na malaman ang dahilan ng paghinto ng transmission sa transparency server gayundin ang mga pumalyang vote counting machines (VCMs) at depektibong SD cards.
Nagtataka ang Senador dahil nagsagawa na ng testing ang Comelec bago ang eleksyon pero nagkaroon pa rin ng mga kapalpakan.
Samantala, aalamin din sa hearing ang alegasyon ni Comelec Commissioner Rowena Guanzon na pina sub-contract ng National Printing Office (NPO) sa Holy Family Printing ang imprenta ng voter’s information sheet.
Partikular na nais malaman ni Pimentel kung sino ang pumasok sa kontrata ng sub-contract at kung may paglabag ito sa bidding rule.