Sa bisa ng search warrant, nagkasa ng operasyon ang Philippine National Police-Criminal Investigation and Detection Group (PNP-CIDG) at Municial Police Station sa bahay ni San Francisco Mayor Guia Nimez Plaza-Sabanal sa Barangay Poblacion pasado 6:00 ng gabi.
Nang dumating ang mga otoridad, biglang umalis ang grupo ng mga kalalakihan na pinaniniwalang supporters ng alkalde.
Naiwan naman ng mga ito ang isang sling bag. Nakita ng mga pulis sa bag ang isang caliber .38 revolver, limang round ng bala para rito at isang fragmentation grenade.
Maliban dito, nakuha rin ang P6 milyong cash, sample ballots, at listahan ng mga botante at kanilang precinct number.
Dahil dito, inimbitahan si Sabanal sa istasyon ng pulisya para sa imbestigasyon.
Itinanggi naman ni Sabanal na sa kanya ang mga nakumpiskang armas at bala.
Hindi naman nagbigay ng komento ang alkalde sa nakuhang pera.
Sa ngayon, dinala na ng CIDG ang mga armas sa kanilang opisina.