Gamit ang kaniyang Instagram Account ay sinagot ng aktor na si Edu Manzano ang isyu hinggil sa kaniyang kandidatura.
Ito ay makaraang lumabas ang balita hinggil sa pagkansela ng Commission on Elections (Comelec) sa kaniyang certificate of candidacy (COC) bilang kandidato sa pagka-kongresista ng San Juan City.
Tinanong ng netizens si Manzano kung totoo bang nakansela na ang kaniyang kandidatura.
Paliwanag ni Manzano, ang Comelec 2nd division lamang ang nagpasya na ikansela ang kaniyang COC bunsod ng pagkwestyon sa kaniyang citizenship.
Sinabi ni Manzano na may pareho nang reklamo na isinampa sa kaniyang dati kung saan pinaburan siya ng korte Suprema.
Iyon ay noong tumakbo siya at nanalo siyang vice mayor ng Makati.
Ani Manzano, iaapela niya sa en banc ng Comelec ang pasya ng 2nd division at handa siyang iakyat ito sa Korte Suprema.