Women Crisis Center sa Zamboanga City nasunog

Sumiklab ang sunog sa Women Crisis Center sa Zamboanga City Biyernes ng gabi.

Ayon kay Crisel Cose, tauhan sa center, nagsimula ang apoy sa isang kwarto sa ikalawang palapag pasado alas 8:00 ng gabi.

Mayroon anyang pumutok at mabilis na lumaki ang apoy.

Agad namang dumating ang mga bumbero kaya hindi na kumalat ang apoy sa unang palapag ng center.

Walang nasaktan sa sunog dahil nailikas ang 19 na babae na nasa loob ng center.

Iniimbestigahan ang dahilan ng sunog at halaga ng pinsala sa ari-arian.

Ang center ay nasa ilalim ng City Social Welfare and Development Office at ito ang nangangalaga sa mga batang babae na biktima ng pag-abuso o lumabag sa batas.