NCCA: San Agustin Church hindi matatanggal sa listahan ng World Heritage Site
Tiniyak ng National Commission for Culture and Arts (NCCA) na hindi matatanggal sa listahan ng World Heritage Site ang San Agustin Church sa Maynila dahil sa konstruksyon ng Binondo-Intramuros bridge na pinondohan ng China.
Sa pulong balitaan sa Malakanyang araw ng Huwebes, sinabi ni Fr. Harold Rentoria, Commissioner for Cultural Heritage ng NCCA, inaantay na lamang nilang matapos ang archaeological assessment at heritage impact assessment na tutukoy kung maaapektuhan ba ng konstruksyon ng proyekto ang pagkakabilang ng San Agustin Church sa listahan.
Una rito, nagbabala ang UNESCO na matatanggal sa listahan ang San Agustin Church dahil maaari itong maapektuhan ng itinakdang buffer zone
Pero sinabi ni Fr. Rentoria na nagpapatuloy ang koordinasyon nila sa DPWH na unang nagsuspinde ng konstruksyon ng proyekto upang bigyang daan ang pag-aaral na inaasahang matatapos sa Mayo.
Kapag naapektuhan anya ang buffer zone, igigiit nila sa DPWH na hindi maaaring ituloy ang konstruksyon sa pangambang matanggal sa listahan ang simabahan sa World Heritage Site.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.