8 patay, 8 sugatan sa aksidente sa Kalinga

Patay ang walong katao habang sugatan ang walong iba pa makaraang mahulog sa bangin ang isang elf truck sa Tabuk City, Kalinga.

Nangyari ang aksidente sa Binongsay Road sa Barangay Malin-awa umaga ng Sabado De Gloria, April 20.

Sa post sa Twitter ni Philippine Red Cross Chairman at Senator Richard Gordon, sinabi nitong agad rumesponde ang mga tauhan ng PRC sa lugar na pinangyarihan ng insidente.

Ang mga nasugatang pasyente ay agad dinala sa Kalinga Provincial Hospital at sa Almora General Hospital.

Patuloy naman ang imbestigasyon ng pulisya sa nangyaring aksidente.

Pero sa inisyal na pagsisiyasat ay nawalan umano ng preno ang truck kaya nahulog sa bangin.