Patay sa pamamaril ang isang babaeng dentista sa loob ng kanyang sasakyan sa Barangay Rawis, Calbayog City, Samar Lunes ng hapon.
Ayon sa pulisya, iniimbestigahan pa ang motibo sa pagpatay kay Dr. Vicky Romhur, 69 anyos.
Inaalam kung may koneksyon ang pagpatay sa dentista sa hindi pa nareresolbang pagpatay din sa kapatid nitong babae na si Catherine Romhur Johnson.
Pinatay din ang kapatid ng dentista habang bumibili ito ng tinapay sa isang bakery noong nakaraang taon.
Nabatid na minamaneho ni Dr. Romhur ang gray Mitsubishi Strada pickup nito at pauwi na sa kanyang bahay sa Narcisa Hills Subdivision dakong 4:45 ng hapon nang ilang beses itong binaril sa mukha ng hindi pa kilalang suspek.
Umabante pa ang sasakyan hanggang 100 metro bago ito huminto dahil tuluyan nang namatay ang dentista.