Inilabas ang isang ‘star studded’ music video ng standard bearer ng Liberal Party o LP na si dating DILG Secretary Mar Roxas at Camarines Sur Rep. Leni Robredo.
Mapapanuod sa music video na may pamagat na “Fast Forward” ang mga Filipino celebrity supporters ng tinatawang na Mar-Leni tandem, na pambato ng administration party sa 2016 Elections.
Kabilang sa makikita sa music video ang singers na sina Billy Crawford, Jay-R at Chris Lawrence, na umawit ng kantang Fast Forward.
Kasama rin ang popular Kapamilya loveteam na sina Daniel Padilla at Kathryn Bernardo, Diamond Star Maricel Soriano at basketball player na si James Yap.
Nag-chest bump pa sa video sina Roxas at Yap na dating mister ni presidential sister Kris Aquino.
Ang iba pang celebrity supporters na mapapanuod sa video ay sina Karylle, Angelu de Leon, Carla Abellana, Melai Cantiveros, Jason Francisco, Chokoleit, Ramon Bautista, Rufa Mae Quinto, at Martin del Rosario.
Present din sa music video ang asawa ni Roxas na si TV/Radio Broadcaster Korina Sanchez; maging ang tatlong anak ni Robredo na sina Aika, Tricia at Jillian.
Ang kantang Fast Forward ay composed nina Lawrence, Jay-R at Vehnee Saturno.