SWS: Satisfaction rating ni Pangulong Duterte sa Q1 2019 nanatiling ‘very good’
Mayorya pa rin ng mga Filipino ang nasisiyahan sa pagganap ni Pangulong Rodrigo Duterte sa kanyang tungkulin ayon sa resulta ng survey ng Social Weather Stations (SWS).
Nakakuha ng +66 na satisfaction rating ang pangulo na nasa kategoryang ‘very good’ sa unang tatlong buwan ng 2019 na mas mataas ng anim na puntos sa kanyang +60 noong December 2018.
Ang survey ay isinagawa noong March 28 hanggang 31 kung saan 79 percent ng adult Filipinos ang nagsabing sila ay satisfied o nasisiyahan sa pagganap ng presidente sa tungkulin.
Mas kaunti naman ang nagsabing sila ay dissatisfied o hindi nasisiyahan sa 13 percent para maitala ang net satisfaction rating na +66.
Umabot naman sa eight percent ang undecided o hindi tiyak kung sila ay nasisiyahan o hindi.
Pinakamataas ang satisfaction rating ni Duterte sa Mindanao sa +88 na ‘excellent’, habang very good sa Visayas, Metro Manila at Balance Luzon na may tig +69, +61 at +56.
Ang +66 net score ng pangulo ay tumapat sa kanyang personal high rating na naitala noong June 2017.
Isinagawa ng SWS ang survey sa pamamagitan ng face-to-face interviews sa 1,440 adults sa buong bansa.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.