Sa pahayag ni Meralco spokesperson Joe Zaldarriaga araw ng Huwebes, sinabi nito na sa inisyal na pagsuri nila ay magkakaroon ng kaunting pagtaas sa adjustment sa spot market.
Iaanunsyo ng Meralco ang eksaktong halaga ng dagdag singil sa susunod na linggo.
Samantala, sa ika-apat na sunod na araw ay muling nagtaas ng yellow alert sa Luzon Grid dahil naging manipis ang reserbang kuryente.
Ito ay dahil sa pagpalya ng ilang planta ng kuryente habang ang iba ay nagbawas ng produksyon ng kuryente.
Gayunman ay tiniyak ng Department of Energy (DOE) na sapat pa rin ang suplay ng kuryente sa buong panahon ng tag-init.
Siniguro pa ng ahensya na walang mararanasang brownout kahit may yellow alert sa Luzon Grid.
Pero wala mang power interruption ay maaari namang magdulot ang yellow alert ng dagdag presyo sa mga consumer dahil sa pagtaas ng presyo ng kuryente sa spot market.
Mula sa P3 hanggang P5 kada kilowatt hour na bentahan, may ilang oras na pumalo ang presyo sa P32 kada kilowatt hour.
Sa electricity bill sa Mayo lalabas ang dagdag singil dahil sa magkakasunod na 4 na araw na yellow alert.