P4.8M halaga ng shabu nakuha sa Angeles City, Pampanga

Hindi bababa sa P4.8 milyong halaga ng shabu ang nakuha mula sa isang babae sa ikinasang buy-bust operation sa Angeles City, Pampanga Huwebes ng umaga.

Ayon kay Angeles City police director Col. Narvin Mangune, nakuha ang mga kontrabando sa suspek na si Mary Anne Buntas Dedic, 35-anyos.

Si Dedic ay kabilang sa drugs watchlist ng pulisya.

Naaresto ang suspek sa loob ng kaniyang bahay sa bahagi ng Barangay Balibago dakong 11:30 ng umaga.

Nakabili ang isang pulis na nagsilbing poseur-buyer ng isang kilo ng shabu na nagkakahalaga ng P1 milyon.

Nakuha naman ang iba pang kontrabando sa loob ng bahay ng suspek.