Sa panayam kay Arroyo sa isang convention araw ng Biyernes, sinabi nito na maaari namang gumamit ng savings ang gobyerno para pondohan ang SEA Games.
Iginiit din ng opisyal na nabawasan ang pondo para sa naturang regional games pero hindi ang Kamara ang may kagagawan nito.
Paliwanag naman ni House Deputy Speaker Prospero Pichay na miyembro rin ng Philippine Olympic Committee executive council, may limitasyon lamang sa paggamit ng savings.
Halimbawa anya, ang savings ng Department of Public Works and Highways (DPWH) ay hindi naman maaaring gastusin para sa sports dahil hindi ito papayagan ng Commission on Audit (COA).
Sinabi rin ni Pichay na noong una ay P7 bilyon ang pondo para sa SEA Games na iniatang sa Department of Foreign Affairs (DFA) noong si Alan Peter Cayetano pa ang kalihim nito.
Gayunman, binawasan umano ng bicameral conference committee ang budget sa P5 bilyon at ang alokasyon ay ibinigay sa Philippine Sports Commission (PSC).
Ani Pichay, dahil sa budget impasse, walang pera na nagagastos ngayon para sa SEA Games.
Samantala, sa isang pahayag sinabi naman ng Department of Budget and Management na popondohan ang SEA Games sa kabila ng isyu sa pambansang budget.
Ang konstruksyon ng sports facilities ay patuloy umanong umaarangkada sa pamamagitan ng Public-Private Partnership (PPP).
Ang non-infrastructure requirements naman ay popondohan umano ng National Sports Development Fund.
Ang main events para sa SEA Games ay magaganap sa New Clark City sa Tarlac.