Presyo ng produktong petrolyo at LPG tumaas ngayong araw

Dagdag na presyo sa Liquefied Petroleum Gas (LPG) at sa mga produktong petrolyo ang sumalubong sa unang araw ng buwan ng Disyembre ngayong 2015.

Epektibo alas 6:00 ngayong araw (Martes, December 1) nagpatupad ng dagdag na P2.80 ang Petron sa kada kilo ng kanilang LPG.

Katumbas ito ng P30.8 na dagdag sa 11-kilogram LPG cylinder ng nasabing kumpanya.

Ngayong alas 6:00 din ng umaga, ang mga kumpanyang Shell, Petron at Sea Oil ay nagpatupad ng dagdag na P0.45 sa presyo ng kada litro ng Gasolina, P0.20 sa kada litro ng diesel at P0.10 centavos sa kada litro ng kerosene.

Ang PTT at Phoenix Petroleum ay may pareho ring price adjustment sa kanilang gasolina at diesel.

Mas mataas naman ang idinagdag ng Chevron sa presyo ng kerosene na P0.20 sa kada litro at parehong halaga ang idinagdag sa gasolina at diesel.