Senator Dick Gordon nadismaya sa pag-veto sa ‘OSG bill’
Binatikos ni Senator Dick Gordon ang ginawang pag-veto ni Pangulong Duterte sa naipasang panukala na magpapalakas pa sana sa Office of the Solicitor General.
Sinabi ni Gordon na nagsayang lang sila ng pondo ng bayan at panahon sa pagta-trabaho para maipasa ang Senate Bill No 1823 at House Bill No. 7376 dahil napunta lang sa wala.
Pagdidiin nito, ang Malakanyang ang may gusto ng mga panukala at nag-lobby pa aniya ang administrasyon ngunit sa dakong huli ay na-veto lang ito.
Binalewala ni Pangulong Duterte ang mga panukala sa pangamba na magdudulot ito ng malaking pagkakaiba sa suweldo ng mga kawani sa hudikatura at ehekutibo.
Ayon kay Gordon isinulong niya ang panukala para pumantay ang mga benepisyo ng Solicitor General at kanyang mga abogado sa kanilang mga kasama sa ibang sangay ng hudiktura.
Layon aniya nito na marami ang mahikayat na mag-trabaho sa OSG.
Naipasa ang panukala sa Senado noong nakaraang Setyembre matapos paboran ng 16 senador.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.