Puganteng Korean arestado ng BI

Naaresto ng Bureau of Immigration (BI) ang isang 49-anyos na Koryano na wanted sa kasong drug trafficking.

Dinakip ng tauhan ng Fugitive Search Unit (FSU) ng BI si Lee Yun Sung katuwang si Korean Police Attache Chang Sungsoo sa Barangay Sangandaan, Caloocan.

Ayon sa ahensya, sinabi ni Consul at Police Attache Lee Soo Bok mula sa Embahada ng Korea na isang undocumented alien si Lee.

Wanted si Lee sa kasong paglabag sa Korean Narcotics Control Act.

Mayroon ding inilabas na warrant of arrest ang tatlong korte sa Korea laban kay Lee dahil sa drug smuggling.

Sa ngayon, pinoproseso na ng ahensya ang deportation proceedings kay Lee.