Pulis Pasig, arestado sa robbery-extortion; buong miyembro ng Drugs Unit, sinibak
Matinding galit ang inabot ng isang pulis mula kay NCRPO chief Major General Guillermo Eleazar matapos itong naaresto sa entrapment operation sa Pasig City.
Hindi napigilan ni Eleazar na sampalin at saktan ang pulis na si Police Corporal Marlo Siblao Quibete ng District Drug Enforcement Unit sa Pasig City.
Ayon kay Eleazar, tinanggap ni Quibete ang P20,000 sa entrapment operation ng NCRPO Regional Special Operations Unit sa Evangelista Street kanto ng De la Paz Street sa Barangay Santolan, Pasig City.
Nag-ugat ang kaso sa reklamo ni Eva Kilala, live in partner ni Aries Ochoada na nahuli sa buy bust operation sa Barangay Marikina Heights, Marikina City.
Bukod sa perang kinuha ng pulis na nasa P60,000 ay kinuha rin nito ang gintong kwintas ni Kilala habang ang motorsiko ni Ochoada ay pilit na pinapirmahan ang deed of sale nito.
Hindi pa umano nakuntento ang pulis at humingi pa ng dagdag na pera kaya nagsumbong na si Kilala sa NCRPO.
Panawagan naman ni Eleazar sa publiko, huwag matakot na isumbong ang mga umaabusong pulis.
Samantala, sinibak na ang lahat ng miyembro ng Pasig Police Drug Enforcement Unit kabilang ang kanilang hepe.
Nahaharap naman sa kasong robbery extortion si Quibete.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.