Comelec pag-aaralan ang hiling na debate ng Otso Diresto vs. Hugpong ng Pagbabago

Sinabi ng Commission on Elections (Comelec) na pag-aaralan nito ang mungkahi ng Otso Diretso na pangunahan ng poll body ang isang debate sa pagitan nila at ng Hugpong ng Pagbabago.

Ayon kay Comelec Spokesperson James Jimenez, matagal na rin nilang nararamdaman ang pangangailangan para sa isang debate.

Sinabi naman ni Commissioner Rowena Guazon na nakatakdang talakayin ang hiling ng Otso Diretso sa kanilang en banc meeting.

Sa kanilang sulat sa Comelec, binanggit ng Otso Diretso ang pahayag ni HP founding chairman Sara Duterte-Carpio na dapat ay humanap ng third party organizer para sa debate.

Nais ng opposition senatorial bets ng debate para malaman ng publiko ang mga plataporma at posisyon ng mga kandidato sa mahahalagang isyu.