Muling nagkabit ng mga CCTV camera ang Philippine National Police sa mga lansangan sa Metro Manila para ipantapat sa mga masasamang loob.
Sa second phase ng ‘Project Safe Kam’, 34 na security camera ang inilagay ng mga PNP sa paligid ng Monumento sa Caloocan City.
Ayon kay DILG Secretary Mar Roxas, isa ang Monumento sa Caloocan City sa Top 5 crime-prone areas sa kalakhang Maynila.
Sa pinakahuling datos aniya, mula sa 28 kaso ng robbery at iba pang uri ng krimen sa lugar, ay bumaba na ito sa 10 kada linggo matapos ilunsad ang Oplan Lambat-Sibat ng PNP.
Gayunman, umaasa si Roxas na sa pamamagitan ng mga CCTV ay mababawasan pa ang insidente ng kriminalidad sa naturang lugar.
Una nang nagkabit ng 32 CCTV sa EDSA-Taft intersection sa Pasay City noong Mayo.
Sa ilalim ng Project Safe-Kam, balak ng PNP na maglagay pa ng mga security camera sa University Belt sa Maynila, MRT North EDSA sa Cubao, Quezon City at sa Baclaran, Parañaque. – Jan Esocsio/Jay Dones