60 minero natabunan sa gumuhong gold mine sa Indonesia

Gumuho ang isang minahan ng ginto sa Sulawesi, Indonesia.

Ayon sa disaster agency ng Indonesia, pinangangambahan nilang aabot sa 60 na katao ang natabunan sa pagguho ng minahan sa bahagi ng Bolaang Mongondow sa North Sulawesi.

Alas 5:00 ng umaga oras sa Indonesia, sinabi ng disaster agency na mayroon nang isang natagpuang patay at 13 ang nailigtas.

Patuloy pa ang paghahanap sa marami pang natabunan.

Ayon kay disaster agency spokesman Sutopo Purwo Nugroho, nasa kasagsagan ng pagmimina ang mga trabahador nang biglang mawasak ang beams at supporting boards sa minahan.