Ayon sa National Capital Regional Police Office (NCRPO), nakatanggap sila ng tawag mula sa mga opisyal ng Brgy. Commonwealth kaugnay ng umanoy mga taong nangunguha ng mga bata sa lugar.
Pagdating sa lugar alas 3:3o ng hapon ay nasa kustodiya na ng barangay si Norly Rafael pero nakatakas ang mga kasabwat nito.
Sa panayam sa naarestong suspek, ibinunyag nito na naghihintay ang mga kasama nito sa Tala, Caloocan City.
Nagsagawa ng hot pursuit operation na nagresulta sa pagka-aresto kina Danilo Bacabis at Bonifacio Lababo.
Samantala, sinabi ni NCRPO chief Director Guillermo Eleazar na ang mga naaresto ay suspek sa tangkang pagkidnap sa limang bata sa Litex Road, Quezon City.
Ang modus anya ng mga suspek ay kunwaring nanghaharana at may dalang gitara.
May aktuwal na insidente na nilapitan ang isang 4 anyos na bata pero nagpumiglas ito at nakauwi.
Nilinaw ni Eleazar na walang nakuhang bata pero nakakaalarma anya ang insidente at nais ng pulisya na huwag na itong maulit.