American missionary na umano’y biktima ng tanim-bala sa NAIA, humarap sa pagdinig ng korte
Humarap sa pagdinig ng Pasay Regional Trial Court Branch 119 ang American Missionary na si Lane Michael White na nahulihan umano ng bala sa kaniyang bagahe sa Ninoy Aquino International Airport.
Itinuloy ng korte ang pagdinig sa ihinaing motion for judicial determination of probable cause na isinumite ng kampo ni White sa pamamagitan ng abogadong si Atty. Ernesto Arellano.
Iginigiit ni Atty. Arellano na walang sapat na ebidensya para masampahan ng kaso si White dahil sa umano’y nahuling bala sa bagahe nito.
Matapos ang pagdinig, pinayagan ni presiding judge Pedro Gutierrez ang kampo ni White na mabigyan ng tatlong araw para pormal na maisalang ang kanilang mosyon.
Sa ngayon submitted for resolution na ang kaso pero hinihiling ni Gutierrez na makuha muna ang findings ng imbestigasyon ng National Bureau of Investigation sa kaso bago tuluyang magdesisyon sa mosyon.
Ipinapalakip ni Gutierrez ang NBI report sa isinasagawang imbestigasyon sa usapin ng umano’y tanim-bala sa NAIA.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.