PAGASA: Walang sama ng panahon sa bansa sa loob ng 2-3 araw

Wala pa ring namamataang sama ng panahon na makakaapekto sa bansa sa susunod na dalawa hanggang tatlong araw.

Ayon sa 4am weather update ng PAGASA, hanging Amihan pa rin ang weather system na umiiral sa buong bansa.

Ngayong araw, ang Caraga at Davao Region ay makararanas ng maulap na kalangitan na may mahihina hanggang sa katamtamang mga pag-ulan dahil sa Amihan.

Bahagya hanggang sa maulap na kalangitan naman ang mararanasan sa buong Luzon, Visayas at nalalabing bahagi ng Mindanao na may posibilidad lamang ng mahihina hanggang sa katamtamang mga pag-ulan.

Magandang balita naman sa mga mangingisda dahil walang nakataas na gale warning o ligtas ang paglalayag sa mga baybaying dagat ng bansa.